|
MARTYROLOGIUM
ROMANUM
IANUARIUS
Die 1 ianuárii
n octáva Nativitátis Dómini et die eius Circumcisiónis, sollémnitas sanctæ Dei Genetrícis Maríæ, quam Patres in Concílio Ephesíno Theotókon acclamáverunt, quia ex ea Verbum carnem assúmpsit et inter hómines habitávit Dei Fílius, prínceps pacis, cui Nomen super omne nomen datum est.
2. Cæsaréæ in Cappadócia, deposítio sancti Basílii, epíscopi, cuius memória crástina die ágitur.
3. In Campánia et Aprútio, commemorátio sancti Iustíni, qui epíscopus celebrátur, zelo et christifidélium defensióne clarus.
5. Ad montem Iuram in pago Gálliæ Lugdunénsis, commemorátio sancti Eugéndi, abbátis Condatiscénsis, qui iam inde a púeritia in monastério degit, ubi vitam commúnem monachórum omni stúdio promóvit.
6. Ruspis in Byzacéna, sancti Fulgéntii, epíscopi, qui, múnere procuratóris Byzacénæ functus, mónachus evásit; deínde epíscopus efféctus, témpore vandálicæ persecutiónis, ab ariánis multa perpéssus est et in Sardíniam a rege Thrasamúndo bis relegátus. Tandem pópulo suo restitútus, eum per réliquos vitæ annos veritátis et grátiæ verbo fidéliter nutrívit.
7. Viénnæ in Burgúndia, sancti Clari, abbátis monastérii Sancti Marcélli, qui religiósæ perfectiónis exémplum mónachis trádidit.
8. Trecis in Néustria, sancti Frodobérti, fundatóris et primi abbátis monastérii Cellénsis.
9. In monastério Fiscamnénsi in Normánnia, tránsitus sancti Guliélmi, abbátis Sancti Benígni Divionénsis, qui novíssimis vitæ suæ tempóribus plúrimos mónachos in quadragínta monastériis distribútos fírmiter ac prudénter rexit.
10. Apud Silviníacum in Burgúndia, tránsitus sancti Odilónis, abbátis Cluniacénsis, qui, sevérus in se, in áliis vero dulcis et miséricors, inter belligerántes indútias pro Deo instítuit et, témpore famis, omnímodo afflíctos levávit, dein primus commémoratiónem ómnium fidélium defunctórum postrídie festi Omnium Sanctórum in monastériis suis constítuit.
11. Gablónæ in Bohémia, sanctæ Zdislávæ, matrisfamílias, quæ afflíctis magno solácio fuit.
12. Gualdi Captaneórum in Umbria, beáti Hugolíni, qui vitam eremíticam duxit.
13. Romæ, sancti Ioséphi Maríæ Tomasi, presbýteri ex Ordine Clericórum Regulárium vulgo Theatinórum et cardinális, qui, cultus divíni instauratiónem ardénter cúpiens, in perquiréndis edendísque antiquióribus sacræ Litúrgiæ téxtibus et monuméntis totíus fere vitæ tempus exégit atque púeris catechizándis óperam dedit.
14. Apríliaci apud Andégavum in Gállia, beatórum fratrum Ioánnis et Renáti Lego, presbýterorum et mártyrum, qui, gállica perturbatióne sæviénte, cum nefárium iusiurándum clero impósitum iuráre recusássent, decolláti sunt. 15. Romæ, sancti Vincéntii Maríæ Strambi, epíscopi Maceraténsis et Tolentini, e Congregatióne Pássionis, qui commíssas ipsi dioecéses sancte rexit et ob fidelitátem erga Románum Pontíficem servátam exsílium perpéssus est.
16. Hasseléti prope Traiéctum Mosæ in Bélgio, beáti Valentíni Paquay, presbýteri ex Ordine Fratrum Minórum, qui in præcatióne, ministério reconciliatiónis et mariális corónæ devótióne mirum christiánæ caritátis práebuit exémplum, in spíritu humilitátis e mínimis áttingens summa.
17. Leópoli in Ucraína, beáti Sigismúndi Gorazdowski, presbýteri, qui, polónus natióne, pietáte erga próximum exímius et óperum ad vitam tuéndam præcúrsor, Institútum Sorórum Sancti Ioseph fundávit, omnímodis in bonum Páuperum et derelictórum incúmbens.
18. Intra castra deténtiónis Dacháni prope Monáchium Bavariáe in Germánia, beáti Mariáni Konopiński, presbýteri et mártyris, qui, polónus natióne, atrocitátes a médicis crudéliter irrogátas perpéssus pro Christo Dómino occúbuit.
Die 2 ianuárii
emória Sanctórum Basílii Magni et Gregórii Nazianzéni, episcopórum, et Ecclésiæ doctórum. Basílius, epíscopus Cæsariénsis in Cappadócia, magnus doctrína et sapiéntia appellátus, meditatiónem Scripturárum laborémque in oboediéntia et in fratérna caritáte mónachos dócuit, quorum régulis a seípso conféctis ordinávit vitam, egrégiis scriptis fidéles erudívit atque cura pastoráli Páuperum et infirmórum enítuit; óbiit die prima ianuárii. Gregórius, amícus eius, epíscopus Sasiménsis, deínde Constantinópolitanus, tandem Nazianzénus, divinitátem Verbi magno cum ardóre deféndit, quam ob rem étiam Theólogus est appellátus. Tantórum doctórum coniúncta Memória gaudet Ecclésia.
2. Romæ, deposítio sancti Telésphori, papæ, qui, teste sancto Irenáeo, séptimus ab Apóstolis epíscopus constitútus, gloriósum martýrium duxit.
3. In território Coráno miliário trigésimo ab Urbe, sanctórum Argéi, Narcíssi et Marcéllini, mártyrum.
4. Massíliæ in Província Gálliæ, sancti Theodóri, epíscopi, qui, cum disciplínam Ecclésiasticam institúere conátus esset, a Childebérto et Guntrámno régibus multátus est terque in exsílium pulsus.
5. In monastério Bobiénsi in Æmília, sancti Bladúlphi, presbýteri et mónachi, sancti Columbáni discípuli.
6. Medioláni in Langobárdia, sancti Ioánnis Boni, epíscopi, qui sedem episcopálem, Génuæ éxsulem Langobardórum causa, civitáti suæ restítuit, fíde ac bonis móribus Deo et homínibus gratus.
7. In agro Tutelénsi in Aquitánia, sancti Vincentiáni, eremítæ.
8. Limeríci in Hibérnia, sancti Mainchíni, qui epíscopus cólitur.
9. In monastério Corbeiénsi in pago Gálliæ Ambianénsi, sancti Adalhárdi, abbátis, qui ómnia ita dispósuit, ut unicuíque satis essent, scílicet nec cuíquam superflúerent nec in vácuum quid períret, sed ad Dei laudem benígne daréntur.
10. Mauriánæ in Sabáudia, sancti Airáldi, epíscopi, qui, tum in Portárum solitúdine tum in Maurianénsi sede, pastóris prudéntiæ et consílio austeritátem morésque cartusianórum coniúnxit.
11. Troýnæ in Sicília, sancti Silvéstri, abbátis, sub Sanctórum Patrum orientálium disciplína.
12. Fori Lívii in Æmília, beáti Marcolíni Amanni, presbýteri ex Ordine Prædicatórum, qui in siléntio ac solitúdine, necnon in servítio Páuperum et in puerórum cura totam vitam humíllima simplicitáte perdúxit.
13. Soncíni in Langobárdia, beátæ Stéphane Quinzani, vírginis, soróris Tértii Ordinis Sancti Domínici, contemplátioni Domínicæ pássio nis necnon Christiánæ institutióni puéllarum assídue déditæ.
14. Andégavi in Gállia, beatórum Guliélmi Repin et Lauréntíi Bâtard, presbýterorum et mártyrum, qui, gállica perturbatióne grassánte, ob fidelitátem erga Ecclésiam cápite truncáti sunt.
15. In civitáte Lachine in Quebecénsi Província Cánadæ, beátæ Maríæ Annæ (Maríæ Stellæ) Soureau-Blondin, vírginis, quæ, ad iuventútem usque litterárum ignára, Congregatiónem Sorórum Sanctæ Annæ fundávit pro fíliis agricolárum instituéndis, semper in ministério egrégium práebens exémplum magístræ iuventútis.
Die 3 ianuárii
anctíssimi Nóminis Iesu, in quo solo omne flectátur genu, cæléstium, terréstrium et infernórum, ad glóriam divínæ maiestátis.
2. Romæ in coemetério
Callísti via Appia, deposítio sancti Anthéri, papæ, qui, post Pontiánum
mártyrem, brevem ténuit episcopátum.
3. Apud Nicomedíam in Bithýnia, Sanctórum Theopémpti et Theónæ, qui in persecutióne Diocletiáni imperatóris martýrium obiérunt.
4. Cæsaréæ in Cappadócia, sancti Górdii centuriónis, mártyris, quem sanctus Basílius verum áemulum centuriónis Cruci adstántis laudat, eo quod in Diocletiáni imperatóris persecutióne Iesum Dei Fílium conféssus sit.
5. Patávii in Venétia, commemorátio sancti Daniélis, diáconi et mártyris.
6. Párii in Hellespónto, sancti Theógenis, mártyris, qui, sub Licínio imperatóre inter tirónes ascítus, propter fídem christiánam militáre recúsans, cárceri cruciátibúsque datus est, demum in mare demérsus.
7. Viénnæ in Gállia Lugdunénsi, sancti Floréntii, epíscopi, qui Concílio Iúliæ Valéntiæ hábito intérfuit.
8. Parísiis in Gállia, deposítio sanctæ Genovéfæ, vírginis Nemptodurénsis, quæ quindécim annos nata, sancto Germáno Autissiodorénsi epíscopo hortánte, vírginum velámen accépit, íncolas civitátis Hunnórum incúrsu extérritos firmávit et concíves témpore famis sustínuit.
9. Leóntii in Sicília, sancti Luciáni, epíscopi.
10. In monastério Mannemaménsi in Kérala Indiæ dicióne, beáti Cyríaci Elíæ Chavara, presbýteri, fundatóris Congregatiónis Fratrum Carmelitárum Maríæ lmmaculátæ.
Die 4 ianuárii
1. In Móesia, Sanctórum Hermétis et Caii, mártyrum, quorum alter Retiáriæ alter Bonóniæ.
2. Arvérnæ in Aquitánia, sancti Abrúnculi, epíscopi, qui, primum Ecclésiæ Lingonénsi præpósitus, ob Burgundiórum minas nocte fúgiens apud Arvérnos transmigrávit et sancti Sidónii Apollináris sedem occupávit.
3. Divióne in Burgúndia, sancti Gregórii, qui, postquam multos annos múnere cómitis in regióne Augustodunénsi functus erat, epíscopus Lingonénsis ordinátus est.
4. Ucétiæ in Gállia Narbonénsi, sancti Ferréoli, epíscopi, qui Régulam pro mónachis scripsit et, invídia in exsílium pulsus, post tres annos ágnitus ut verus vir Dei, pópulo suo læto ánimo rédditus est.
5. Meldis in Néustria, sancti Rigoméri, epíscopi.
6. Remis item in Néustria, sancti Rigobérti, epíscopi, qui, contra cánones a Carólo Martéllo, duce Francórum, a sede expúlsus, vitam in humilitáte egit.
7. Bruáci ad Scaldim prope Valentiánam in Artésia Néustriæ, sanctæ Pharáildis, víduæ, quæ, invíta viro violénto nupta, oratiónem et vitæ austeritátem usque ad senectútem ampléxa esse dícitur.
8. Fulgínii in Umbria, beátæ Angelæ, quæ, cóniuge filiísque vita functis, sancti Francísci vestígia sequens, Deo pénitus se dicávit et altióres vitæ mýsticæ experiéntias libro vitæ suæ concrédidit.
9. In Sancta Cruce Vallis Arni in Etrúria, beátæ Christiánæ (Oríngæ) Menabuoi, vírginis, quæ monastérium fundávit sub Régula sancti Augustíni.
10. Dunélmi in Anglia, beáti Thomæ Plumtree, presbýteri et mártyris, qui, sub Elísabeth regína Prima, cápite damnátus propter fidelitátem Ecclésiæ Cathólicæ servátam, quóniam láquei poenam ante patíbulum fórtiter pro vita máluit, eándem súbiit.
11. Emmetsbúrgi in Terra Maríæ e Civitátibus Foederátis Américæ Septemtrionális, sanctæ Elísabeth Annæ Seton, quæ, vídua effécta, fídem cathólicam proféssa est et puéllis instituéndis necnon paupéribus púeris aléndis cum Soróribus a Caritáte Sancti Ioseph, quarum Congregatiónem fundávit, sollértem dedit óperam.
12. Matríti in Hispánia, beáti Emmanuélis González García, epíscopi, qui, exímius iuxta cor Dómini pastor, sanctíssimæ Eucharístiæ cultum summa cum sedulitáte promóvit et Congregatiónem Sorórum Missionariárum a Názareth fundávit.
Die 5 ianuárii
1. Alexandríæ in Ægýpto, sanctæ Syncléticæ, vírginis, quæ vitam eremíticam duxísse narrátur. 2. Carthágine, sancti Deográtias, epíscopi, qui plúrimos a Vándalis captívos ab urbe Roma ductos redémit, quos in duábus amplis basílicis, léctulis atque stramínibus parátis, coadunávit.
3. Romæ, commemorátio sanctæ Æmílianæ, vírginis, ámitæ sancti Gregórii papæ Magni, quæ, paulo post Tharsíllam sorórem, ad Dóminum migrávit.
4. In Británnia Minóre, sancti Convoiónis, abbátis, qui Rotóne monastérium Sancti Salvatóris cóndidit, ubi sub eius disciplína et sancti Benedícti Régula mónachi floruérunt pietáte insígnes, et, coenóbio a Normánnis evérso, apud Plebelánum novum monastérium exstrúxit, ubi octogenárius óbiit.
5. Londínii in Anglia, sancti Eduárdi, cognoménto Confessóris, qui, rex Anglórum pópulo suo propter exímiam caritátem dilectíssimus, regno pacem comparávit atque communiónem cum sede Romána tenáciter promóvit.
6. Prope Falcobúrgum in regióne Limburgénsi, sancti Gerláci, eremítæ, in paupéribus aléndis insígnis.
7. Tudérti in Umbria, beáti Rogérii, presbýteri ex Ordine Minórum, qui, discípulus sancti Francísci, fervens eius imitátor fuit.
8. Andégavi in Gállia, beatórum Francísci Peltier, Iacóbi Ledoyen et Petri Tessier, presbýterorum et mártyrum, qui in gállica perturbatióne, cum sacerdótium fidéles servavíssent, decolláti sunt.
9. Philadelphíæ in Pennsilvánia e Civitátibus Foederátis Américæ Septemtrionális, sancti Ioánnis Nepomucéni Neumann, epíscopi, e Congregatióne Sanctíssimi Redemptóris, qui migrántes paupertátis causa ope, consílio et caritáte adiúvit et de puerórum christiána institutióne summópere sollícitus fuit.
10. Génuæ in Itália, beátæ Maríæ Repetto, vírginis, e Soróribus Dóminæ Nostræ a Refúgio in Monte Calvário, quæ, mundo abscóndita, in afflíctis sublevándis dubiísque in spem salútis erigéndis præclára éxstitit.
11. Eblánæ in Hibérnia, beáti Cároli a Sancto Andréa (Ioánnis Andréæ) Houben, presbýteri e Congregatióne Passiónis, séduli pæniténtiæ Sacraménti ministri.
12. In urbe Jazlowice in Ucraína, beátæ Marcéllinæ Darowska, quæ, cóniuge et primogénito defúnctis, Deo se dicávit et, de Famíliæ dignitáte semper sollícita, ad puéllas instituéndas Congregatiónem fundávit Sorórum ab Immaculáta Conceptióne Beátæ Maríæ Vírginis.
13. Spoléti in Itália, beáti Petri Bonilli, presbýteri, fundatóris Institúti Sorórum a Sacra Família pro puéllis egénis et paréntibus orbátis adiuvándis atque educándis.
14. Cæsaraugústæ in Hispánia, sanctæ Genovéfæ Torres Morales,
vírginis, quæ iam a púeritia vitæ asperitátes expérta et advérsa valetúdine
affécta, Institútum Sorórum a Sacratíssimo Corde Iesu et Angelis fundávit,
ut múlieribus auxílio essent.
Die 6 ianuárii
ollémnitas Epiphaníæ Dómini, in qua triplex recólitur magni Dei et Dómini nostri Iesu Christi manifestátio: in Béthlehem, Iesus infans a magis est adorátus; in Iordáne a Ioánne baptizátus, a Spíritu Sancto unctus et a Deo Patre Fílius vocátus; in Cana Galiláeæ ad núptias aquam in vinum novum mutans glóriam suam manifestávit.
2. Antínoe in Thebáide, Sanctórum Iuliáni et Basílissæ, mártyrum.
3. Nannétibus in Británnia Minóre, sancti Felícis, epíscopi, qui próprii zeli testimónium concívibus desérviens perhíbuit, Ecclésiam cathedrálem ædificávit necnon ruráles gentes continénter evangelizávit.
4. Herbípoli in Francónia Germániæ, beáti Marcárii, abbátis, qui primus monastério Scottórum in hac civitáte práefuit.
5. Barcinóne in Cataláunia Hispániæ, sancti Raymúndi de Penyafort, cuius memória crástina die ágitur.
6. Famagústæ in Cypro ínsula, tránsitus sancti Petri Thomæ, epíscopi Constantinópolitani, ex Ordine Carmelitárum, qui Románi Pontíficis in Oriénte legáti missióne functus est.
7. Fáesulis in Etrúria, sancti Andréæ Corsini, epíscopi, ex Ordine Carmelitárum, qui, austeritáte et assídua sanctárum Scripturárum meditatióne insígnis, convéntus peste vastátos restítuit et Ecclésiam suam sapiénter rexit, paupéribus solácium áfferens et dissidéntes reconcílians.
8. Valéntiæ in Hispánia, sancti Ioánnis de Ribera, epíscopi, vices quoque regis geréntis, qui, sanctíssimæ Eucharístiæ cultor et veritátis Cathólicæ defénsor, pópulum diutúrnis institutiónibus erudívit.
9. Romæ, sancti Cároli de Sétia, religiósi ex Ordine Fratrum Minórum, qui, inde a púeritia victum cotidiánum sibi comparáre coáctus, cómites ad imitatiónem Christi ac Sanctórum inducébat et tandem, ut exoptábat, franciscáli veste indútus ante Sanctíssimum altáris Sacraméntum in adoratiónem se impéndit.
10. Item Romæ, sanctæ Raphaélæ Maríæ a Sacro Corde Porras Ayllón, vírginis, quæ Congregatiónem Ancillárum Sacratíssimi Cordis Iesu instítuit, at mente capta iudicáta in tribulátionibus et pæniténtia vitam sancte complévit.
11. Maríanópoli in Província Quebecénsi Cánadæ, beáti Andréæ (Alaphrídi) Bessette, religiósi e Congregatióne a Sancta Cruce qui insígne sanctuárium in honórem sancti Ioseph ædificándum ibídem curávit.
Die 7 ianuárii
ancti Raymúndi de Penyafort, presbýteri ex Ordine Prædicatórum, qui, vir sciéntia cánonum exímius, de sacraménto pæniténtiæ recte ac fructuóse scripsit et, magíster generális eléctus, novam Constitutiónum Ordinis redactiónem apparávit atque in summa senectúte Barcinóne in Hispánia pie in Dómino obdormívit.
2. Meliténe in Arménia, sancti Polyéucti, mártyris, qui, miles edícto Décii imperatóris diis sacrificáre coáctus, simulácra fregit, quaprópter multa passus est torménta, demum decollátus et ipso sánguine suo effúso baptizátus.
3. Nicomedíæ in Bithýnia, pássio sancti Luciáni, Antiochénæ Ecclésiæ presbýteri et mártyris, qui, doctrína et eloquéntia clarus, ante tribúnal addúctus ad contínuas interrogátiónes torméntis adiúnctas se christiánum intrépide confitebátur.
4. Passáviæ in Norico, commemorátio sancti Valentíni, epíscopi Ráetiæ.
5. Pápiæ in Ligúria, sancti Crispíni, epíscopi.
6. Curiæ Rhætórum apud Helvétios, sancti Valentíniani, epíscopi, qui paupéribus ópibus subvénit, pro captívis prétium solvit et nudis vestes lárgiter donávit.
7. Solemníaci apud Lemóvicum in Aquitánia, sancti Tillónis, qui, discípulus sancti Elígii, faber et mónachus fuit.
8. Constantinópoli, sancti Cyri, epíscopi, qui, mónachus in Paphlagónia, ad sedem Constantinópolitanam evéctus est, qua póstea eiéctus in exsílio óbiit.
9. Cenómani in Gállia, sancti Alderíci, epíscopi, qui ad Dei atque Sanctórum cultum omni stúdio se cóntulit.
10. In silva apud Ringstádium in Dánia, sancti Canúti, cognoménto Lavard, mártyris, qui, dux Slesvicénsis, iustus et prudens principátum ténuit et pietátem fovit, ab hóstibus auctoritátis suæ ínvidis interféctus.
11. Panórmi in Sicília, tránsitus beáti Mattháei Guiméra, epíscopi Agrigentíni, ex Ordine Minórum, Sanctíssimi Nóminis Iesu cultóris et assertóris.
12. Suzútæ in Iapónia, beáti Ambrósii Fernández, mártyris, qui quæstu et lucro ductus in Oriéntem ábiit, sed in Societátem Iesu religiósus póstea admíssus, multis Privátiónibus afflíctus in cárcere pro Christo óbiit.
13. In vico An Bái in Tunquíno, sancti Ioséphi Tuân, mártyris, qui, paterfamílias et agrícola, cum ante crucem, quam calcáre iussus erat, genufléxus orávit, decollátus est sub imperatóre Tu Dúc.
14. Leódii in Bélgio, beátæ Maríæ Terésiæ (Ioánnæ) Haze, vírginis, quæ ad servítium debílium et Páuperum Congregatiónem Filiárum a Cruce cóndidit.
Die 8 ianuárii
1. Hierápoli in Phrýgia, sancti Apollináris, epíscopi, qui sub Marco Aurélio imperatóre doctrína et sanctitáte flóruit.
2. In Líbya, Sanctórum mártyrum Theóphili, diáconi, et Helládii, qui primo laniáti ac téstulis peracútis compúncti, demum in ignem coniécti esse dicúntur.
3. Bellóvaci in Gállia Bélgica, Sanctórum Luciáni, Maximiáni et Iuliáni, mártyrum.
4. Metis item in Bélgica, sancti Patiéntis, epíscopi.
5. In Nórico Ripénsi, sancti Severíni, presbýteri et mónachi, qui, post Attilæ mortem, Hunnórum príncipis, in hanc Provínciam véniens, pópulos inérmes deféndit, feróces mansuefécit, infidéles convértit, monastéria cóndidit et religióne incúltos instrúxit.
6. Pápiæ in Ligúria, sancti Máximi, epíscopi.
7. In monastério Chozíbæ in Palæstína, sancti Geórgii, mónachi et eremítæ, qui, tota hebdómada reclúsus, domínica die cum frátribus orábat, quos in spiritálibus audiébat omnibúsque suadébat.
8. In regióne Aberdonénsi Scótiæ, sancti Nathaláni, epíscopi, caritáte erga páuperes insígnis.
9. Ratísbonæ in Bavária, sancti Erhárdi, qui, génere scotus, stúdio Evangélii propagándi flagrans, hanc regiónem petívit, ubi múnere episcopáli functus est.
10. Morséllæ in Brabántia, sanctæ Gúdilæ, vírginis, quæ in domo sua caritáti et oratióni se cóntulit.
11. Cassíliæ in Hibérnia, sancti Albérti, epíscopi, angli natióne diúque pro Christo peregríni.
12. Venétiis, sancti Lauréntíi Giustiniani, epíscopi, qui hanc Ecclésiam doctrína ætérnæ sapiéntiæ illustrávit.
13. Novi Castri ad Tinam flumen in Anglia, beáti Eduárdi Waterson, presbýteri et mártyris, qui, sub Elísabeth regína Prima cápite damnátus quod sacérdos Angliam petivísset, patíbulo suspénsus est.
Die 9 ianuárii 1. Ancónæ in Picéno Itáliæ, sancti Marcéllini, epíscopi, qui urbem illam, ut sanctus Gregórius papa Magnus scribit, divína virtúte ab incéndio liberávit
2. Cantuáriæ in Anglia, sancti Hadriáni, abbátis, qui, in Africa natus, Neápoli Campániæ Angliam pervénit et, lítteris sacris simul et sæculáribus luculénter instrúctus, discipulórum turmam salutári sciéntia erudívit.
3. In Scótia, sancti Feláni, abbátis monastérii Sancti Andréæ, qui, disciplínæ austeritáte præclárus, in solitúdine vitam exégit.
4. In monte Olýmpo in Bithýnia, sancti Eustrátii, cognoménto Thaumatúrgi, abbátis monastérii Abgári.
5. Thenesíaci in pago Pictaviénsi Aquitániæ, sancti Honoráti de Busentíaco, qui, armentórum negotiátor, pecúnia sua páuperes dotábat et a fúribus, quos increpáverat, necátus est.
6. Certaldi in Etrúria, beátæ Iúliæ della Rena, e Tértio Ordine Sancti Augustíni, quæ angústa in cella prope ecclésiam reclúsa soli Deo vixit.
7. Ancónæ in Picéno Itáliæ, beáti Antónii Fatáti, epíscopi, qui prudéntem et æquánimun in ómnibus missiónibus a Pontifícbus Románis ipsi credítis, austérum in se, largum vero in páuperes se práebuit.
8. Nancéii in Gállia, beátæ Maríæ Terésiæ a Iesu (Aléxiæ) Le Clerc, vírginis, quæ cum sancto Petro Fourier, Congregatiónem Canonissárum Regulárium Nostræ Dóminæ, sub Régula sancti Augustíni, ad instituéndas puéllas excitávit.
9. Seuli in Coréa, sanctárum mártyrum Agathæ Yi, vírginis, cuius et paréntes martýrio coronáti sunt, et Terésiæ Kim, víduæ, quæ in cárcere pro Christo íctibus percússæ, demum iugulátæ sunt.
10. Prope Monáchium Bavariáe in Germánia intra castra deténtiónis Dacháni, beatórum Ioséphi Pawlowski et Casimíri Grelewski, presbýterorum et mártyrum, qui, témpore belli, e Polónia invása a persecutóribus fídei deportáti, per suspéndii cruciátum martýrium complevérunt.
Die 10 ianuárii
1. Romæ in coemetério Callísti via Appia, sancti Miltíadis, papæ, qui, ex Africa oriúndus, pacem Ecclésiæ a Constantíno imperatóre rédditam expértus est, sed a sectatóribus Donáti ácriter vexátus ad comparándam concórdiam prudénter incúbuit.
2. In Thebáide, sancti Pauli, eremítæ, monásticæ vitæ inde ab exórdiis cultóris.
3. Nyssæ in Cappadócia, sancti Gregórii, epíscopi, sancti Basílii Magni fratris, qui, vita et doctrína præclárus, ob rectæ fídei confessiónem sub Valénte imperatóre ariáno e civitáte sua pulsus est.
4. Hierosólymæ, sancti Ioánnis, epíscopi, qui, témpore controvérsiæ de orthódoxa doctrína, magnópere pro Cathólica fíde et pace Ecclésiæ óperam dedit.
5. Deæ Vocontiórum in pago Gálliæ Viennénsi, sancti Petrónii, epíscopi, qui prius monásticam vitam in ínsula Lirinénsi dúxerat.
6. Constantinópoli, sancti Marciáni, presbýteri, in ecclésiis ornándis et indigéntibus sublevándis séduli.
7. Lemóvici in Aquitánia, sancti Valérii, qui solitáriam vitam elégit.
8. Meliténe in Arménia, sancti Domitiani, epíscopi, qui pro conversióne Persárum multum conténdit.
9. Romæ apud sanctum Petrum, deposítio sancti Agathónis, papæ, qui contra monothelitárum erróres íntegram servávit fídem et unitátem Ecclésiæ sýnodis promóvit. 10. In pago Vivariénsi ad Rhódanum in Gállia, sancti Arcóntii, epíscopi.
11. In monastério Cusanensi ad Pyrerneos saltus, sancti Petri Urseoli, qui, ex Venétiarum duce mónachus efféctus, pietáte et austeritáte cláruit atque in erémo prope monastérium vitam degit.
12. In monastério Cavénsi in Campánia, beáti Benincásæ, abbátis, qui centum mónachos in Sicíliam destinávit ad Montis Regális coenóbium nuper exstrúctum, ut illud replérent.
13. Biturígis in Aquitánia, sancti Guliélmi, epíscopi, qui, desidério solitúdinis meditationísque flagrans, mónachus Cisterciénsis Pontiníaci et demum abbas Cadulíaci factus, tandem Ecclésiæ Bituricénsi præpósitus, monásticæ vitæ austeritátem numquam relaxávit et caritáte erga clerum, captívos miserósque enítuit.
14. Amarántii in Lusitánia, beáti Gundisálvi, presbýteri Bracarénsis, qui post longam in Terram Sanctam peregrinatiónem Ordinem Prædicatórum ingréssus est, deínde in erémum secédens, pontem ædificándum curávit et oratióne prædicationéque áccolis prófuit.
15. Arétii in Etrúria, tránsitus beáti Gregórii papæ Décimi, qui, ex archidiácono Leodiénsi ad Petri sedem eléctus, communiónem cum Græcis omnímodo fovit et ad christianórum discídia componénda necnon ad Terram Sanctam recuperándam Concílium Euménicum Lugdunénse Secúndum convocávit.
16. Laurentánæ in Lucánia, beáti Ægídii (Bernardíni) Di Bello, religiósi ex Ordine Fratrum Minórum, qui reclúsus in spelúnca vixit.
17. Arequípæ in Perúvia, beátæ Annæ ab Angelis Monteagudo, vírginis ex Ordine Prædicatórum, quæ consílii dono et prophétia in bonum totíus civitátis cómiter se cóntulit.
18. Perúsiæ in Itália, sanctæ Francíscæ Salésiæ (Leóniæ) Aviat, vírginis, quæ matérna cum dilectióne indústriaque ad óperam iuvénibus præbéndam se devóvit et Oblátas a Sancto Francísco de Salès instítuit.
19. Matríti in Hispánia, beátæ Maríæ a Dolóribus Rodríguez Sopeña, vírginis, quæ, summum christiánæ caritátis práebens testimónium, ad ínfimos Societátis témporis suis, præsértim in subúrbiis maiórum civitátum, própius accéssit et pro evangélio nuntiándo et paupéribus óperariisque in re sociáli provehéndis Institútum Dominárum Catechistárum et Opus Doctrinárum excitávit.
Die 11 ianuárii 1. Romæ, sancti Hýgini, papæ, qui octávus beáti Petri cáthedram ténuit.
2. In Africa, sancti Salvíi, mártyris, in cuius natáli sanctus Augustínus sermónem hábuit ad pópulum Cartháginensem.
3. Tígavæ in Mauretánia, sancti Typásii veteráni, mártyris, qui, ad milítiam ævocátus, quia diis sacrificáre nóluit, decollátus est.
4. Cæsaréæ in Palæstína, sancti Petri, cognoménto Apselámi seu Bálsami, mártyris, qui, sub Maximíno imperatóre, sæpe a práeside omnibúsque adstántibus rogátus, ut iuventúti suæ párceret, eórum exhortatiónibus negléctis, per ignem, velut aurum purissímum, fídem in Christum forti ánimo testátus est.
5. Brúndusii in Apúlia, sancti Léucii, qui primus eiúsdem civitátis epíscopus cólitur.
6. Pápiæ in Ligúria, translátio sanctæ Honorátæ, vírginis Deo dicátæ, soróris sancti Epiphánii epíscopi.
7. In erémo Iudáeæ, sancti Theodósii, coenobiárchæ, qui, sancto Sabæ amícus, post longam solitáriam vitam multos discípulos sibi sócios ascívit et in monastériis a seípso exstrúctis vitam commúnem excóluit, donec multa pro fíde Cathólica passus centenárius tandem in pace Christi quiévit.
8. Foroiúlii in Venétia, sancti Paulíni, epíscopi Aquileiénsis, qui ad fídem Avaros et Slovénos convertére conátus est et ad Cárolum Magnum regem carmen de régula fídei præclárum óbtulit.
9. Cátanæ in Sicília, beáti Bernárdi Scammacca, presbýteri ex Ordine Prædicatórum, qui in egénos præsértim et ægrótos misericórdia enítuit.
10. Londínii in Anglia, beáti Guliélmi Carter, mártyris, qui, vir nuptus, sub Elísabeth regína Prima ob tractátum de schísmate typis éditum Tybúrni láqueo suspénsus est et dire disséctus.
11. In vico Bellegra in Látio Itáliæ, sancti Thomæ de Cora (Francísci Antónii) Placidi, presbýteri ex Ordine Fratrum Minórum, vitæ austeritáte et prædicatióne præclári ac recéssuum conditóris exímii.
12. Prope Gedánum in Polónia, beáti Francísci Rogaczewski, presbýteri et mártyris, qui, témpore occupatiónis Polóniæ sub regímine in Deum hostíli, ob fídem plumbis interféctus est.
Die 12 ianuárii 1. Cæsaréæ in Mauretánia, sancti Arcádii, mártyris, qui, témpore persecutiónis látitans, cum propínquus eius vicem captus esset, sponte iúdici se trádidit ac diis sacrificáre rénuit, quaprópter acerbíssima supplícia passus martýrium consummávit.
2. Constantinópoli, Sanctórum mártyrum Tígrii, presbýteri, et Eutrópii, lectóris, qui, témpore Arcádii imperatóris, cum de incéndio, quo Ecclésia prínceps et senátus cúria conflagráverant, tamquam per eos ad exsílium sancti Ioánnis Chrysóstomi ulciscéndum excitáto, per calúmniam accusáti essent, sub præfécto urbi Optáto, inánium deórum superstitióne implícito et christiánæ religiónis osóre, passi sunt.
3. Areláte in Província Gálliæ, sanctæ Cæsáriæ, abbátissæ, soróris sancti Cæsárii epíscopi, qui pro eádem eiúsque Soróribus Régulam sanctárum vírginum scripsit.
4. Gratianópoli in Burgúndia, sancti Ferréoli, epíscopi et mártyris, quem ad plebem prædicántem ímpii sicárii íctibus interfecérunt.
5. Viremúdæ in Northúmbria, sancti Benedícti Biscop, abbátis, qui, quínquies Romam peregrinátus, secum in pátriam magístros et líbros multos détulit, ut intra monastérii clausúram mónachi sub Régula sancti Benedícti congregáti proféctu sciéntiæ suæ eminéntem revéra Christi caritátem pro Ecclésia lucraréntur.
6. In monastério Rievallénsi item in Northúmbria, sancti Ælrédi, abbátis, qui, in regis Scótiæ aula educátus, in Ordinem Cisterciénsem ingréssus est et, convérsatiónis monásticæ magíster exímius, vitam spiritálem et amicítiam in Christo gestis scriptísque instánter ac suáviter promóvit.
7. Legióne in Hispánia, sancti Martíni de Sancta Cruce, presbýteri et canónici Régularis, Sacrárum Scripturárum viri vere períti.
8. Panórmi in Sicília, sancti Bernárdi de Corileóne, ex Ordine Fratrum Minórum Capuccinórum, mirábili caritáte et pæniténtia præclári.
9. Maríanópoli in Província Quebecénsi Cánadæ, sanctæ Margarítæ Bourgeoys, vírginis, quæ colónis militibúsque levámen omnímodo áttulit et pro puéllis christiána institutióne erudiéndis máximas impéndit curas, quaprópter Congregatiónem Sorórum a Nostra Dómina fundávit.
10. Apríliaci apud Andégavum in Gállia, beáti Antónii Fournier, mártyris, qui, ártifex, témpore gállicæ perturbatiónis, propter fidelitátem Ecclésiæ servátam plumbis cæsus est.
11. Cadómi in Gállia, beáti Petri Francísci Jamet, presbýteri, qui, in religiosás Fílias Boni Salvatóris adiuvándas sive magnæ perturbatiónis témpore sive post pacem Ecclésiæ restitútam omni stúdio incúbuit.
12. Viarégii in Itália, sancti Antónii Maríæ Pucci, presbýteri ex Ordine Servórum Maríæ, qui, fere quinquagínta annos paróchus, ad púeros curándos enísus est egestáte vel morbo circumvéntos.
13. In vico Tomhom prope Bangkókium in Thailándia, beáti Nicolái Bunkerd Kitbamrung, presbýteri et mártyris, qui, Evangélii præco exímius, témpore persecutiónis contra Ecclésiam in cárcerem trusus, in ægrótis adiuvándis ipse phthisi corréptus glorióse occúbuit.
Die 13 ianuárii Idibus ianuárii. Luna:
ancti Hilárii, epíscopi et Ecclésiæ doctóris, qui, ad sedem Pictaviénsem in Aquitánia evéctus, sub Constántio imperatóre ariánæ hǽresi addícto scriptis fídem nicáenam de Trinitáte ac de Christi divinitáte strénue propugnávit, quaprópter quadriénnium in Phrýgiam relegátús est. Commentária quoque celebérrima in Psalmos necnon in Mattháei Evangélium confécit.
2. Singidúni in Móesia, Sanctórum Hermýlii et Stratoníci, mártyrum, qui post sæva torménta sub Licínio imperatóre in Istrum flumen demérsi sunt.
3. Tréviris in Gállia Bélgica, sancti Agrícii, epíscopi, qui palátium a sancta Hélena dona datum in ecclésiam convértit.
4. Remis item in Bélgica, deposítio sancti Remígii, epíscopi, qui, post Clodovéum regem sacro baptísmatis fonti et fídei sacraméntis initiátum, Francórum gentem ad Christum convértit et, annis ultra sexagínta in episcopátu exáctis, sanctitáte conspícuus e vita decéssit.
5. Glasguæ in Scótia, sancti Kentigérni, epíscopi et abbátis, qui ibídem sedem suam constítuit et magnam monachórum Congregatiónem secúndum formam primáevæ Ecclésiæ instituísse narrátur.
6. Capitolíadi in Batánea, sancti Petri, presbýteri et mártyris, qui, Coram Walid Saracenórum príncipe accusátus quod fídem Christi per vias palam docéret, lingua manibúsque et pédibus amputátus et cruci affíxus martýrium, quod ardénter appetíerat, consummávit.
7. Córdubæ in Vandalícia Hispániæ regióne, Sanctórum mártyrum Gumesíndi, presbýteri, et Servidéi, mónachi, qui, cum ante Mauras príncipes iudicésque se christiános proféssi essent, ob Christi fídem occubuérunt.
8. In monastério Ilbenstadénsi in Germánia, sancti Godefrídi, qui, comes Capenbergénsis, bonis invítis, ipsum castrum suum in monastérium mutári vóluit et, hábitu canonicáli assúmpto, egénis et infírmis strénuam navávit óperam.
9. Prope Hóium in pago Leodiénsi, sanctæ Iuttæ, quæ, vídua, ad leprósos curándos se cóntulit, tandem prope eos reclúsa vitam degit. 10. Medioláni in Langobárdia, beátæ Verónicæ de Binásco Negroni, vírginis, quæ monastérium Sanctæ Marthæ sub Régula sancti Augustíni ingréssa, ad altissímam se cóntulit contemplátionem.
11. In urbe Nam Dinh in Tunquíno, Sanctórum mártyrum Domínici Pham Trong (Án) Kham, Lucæ (Cai) Thín, eiúsdem fílii, et Ioséphi Pham Trong (Cai) Ta, qui sub imperatóre Tu Đức, torménta mortémque subíre maluérunt quam crucem calcáre.
12. Intra castra deténtiónis Dacháni prope Monáchium Bavariáe in Germánia, beáti Æmílii Szramek, presbýteri et mártyris, qui, polónus natióne, in tempestáte belli hunc in campum inhumáne ob Christi fídem coram persecutóribus defénsam deportátus est et torméntis excruciátus occúbuit.
Die 14 ianuárii
1. Commemorátio sancti Potíti, mártyris, qui Sárdicæ in Dácia multa passus, demum gládio martýrium consecútus esse narrátur.
2. Antiochíæ in Sýria, sancti Glycérii, diáconi et mártyris.
3. Nolæ in Campánia, sancti Felícis, presbýteri, qui, ut sanctus Paulínus refert, persecutionibus furentihus, in cárcerem coniéctus acerbíssima sustínuit torménta et, pace tandem conciliata, inter suos rédiit in paupertáte secédens ad senéctam usque, conféssor fídei invíctus.
4. Commemorátio Sanctórum monachórum, qui Raíthi et in monte Sina ob Christi fídem interfécti sunt.
5. Apud Hibéros ultra Pontum Euxínum, sanctæ Ninónis, quæ, capta christiána, ob vitæ suæ sanctimóniam tantam adépta est reveréntiam et admiratiónem ómnium, ut regínam ipsam, cuius filíolum suis précibus sanáverat, regem et univérsam gentem suam ad Christi fídem allíceret.
6. Apud Gábalos in Gállia, sancti Firmíni, epíscopi.
7. Arvérnæ in Aquitánia, sancti Euphrasii, epíscopi, cuius sanctus Gregórius Turonénsis laudat hospitalitátem.
8. Medioláni in Ligúria, deposítio sancti Dátii, epíscopi, qui in controvérsia de Tribus Capítulis Vigílii papæ senténtiam deféndit, quem Constantinópolim comitátus est, ubi de vita decéssit.
9. Astígi in Báetica, sancti Fulgéntii, epíscopi, cui, fratri sanctórum Leándri, Isidóri et Florentínæ, Isidórus tractátum «De offíciis ecclésiasticis » dicávit.
10. Taliacótii in Aprútio, beáti Odónis Novariénsis, presbýteri ex Ordine Cartusianórum.
11. Utini in Venétia, beáti Odoríci de Portu Naónis Mattiuzzi, presbýteri ex Ordine Minórum, qui, per quas Tartarórum, Indórum Sinensiúmque regiónes progréssus est usque ad Sinárum príncipem urbem Kambalik, eásdem Evangélii prædicatióne longe latéque perlústrans multos ad Christi fídem perdúxit.
12. Batáviæ in Surinámia, beáti Petri Donders, presbýteri e Congregatióne Sanctíssimi Redemptóris, qui indeféssa caritáte leprosórum tam córporum quam animárum curam egit.
Die 15 ianuárii Décimo Octávo Kalendas februárii. Luna:
1. Anágniæ in Látio, sanctæ Secundínæ, vírginis et mártyris.
2. Constantinópoli, sancti Ioánnis Calybítæ, qui, ut fertur, aliquámdiu in patérnæ domus recéssu, dein in «kalýba», scílicet tugúrio, habitávit, totus contemplátioni déditus et e conspéctu ipsórum paréntum ábditus, a quibus post mortem tantum ágnitus est ex códice aureo, quem fílio déderant.
3. In monastério Cluain Credal in Hibérnia, sanctæ Itæ, vírginis eiúsdem monastérii fundatrícis.
4. Reáte in Sabína, commemorátio sancti Probi, epíscopi, cuius elógium sanctus Gregórius papa Magnus fecit.
5. Glannafólii ad Lígerim in território Gálliæ Andegavénsi, sancti Mauri, abbátis.
6. In pago Ruthenénsi item in Gállia, sanctæ Tarsíciæ, vírginis et mártyris.
7. Haméti m Brabántia, sancti Ablebérti seu Eméberti, epíscopi Cameracénsis.
8. Carnúti in Néustria, sancti Malárdi, epíscopi.
9. In valle Anauniénsi in agro Tridentíno, sancti Romédii, anachorétæ, qui, bonis suis Ecclésiæ allátis, vitam pæniténtem duxit in erémo adhuc nómine suo appelláto.
10. Lugdúni in Gállia, tránsitus sancti Boníti, epíscopi Arvernórum, qui, præféctus Massíliæ ad episcopátum in locum sancti Avíti fratris sui evéctus, decem post annis múnere abdicáto, in Magnilocénsi coenóbio degit et, Roma peregrínus rédiens é, Lugdúni óbiit.
11. Armi prope Rhégium Iúlii in Calábria, sancti Arsénii, eremítæ, qui oratióne et austeritáte enítuit.
12. Apud Fanum Sancti Ægídii in Província, beáti Petri de Castronóvo, presbýteri et mártyris, qui, in monastérium Cisterciénse Fontis Frígidæ ingréssus, ab Innocéntio papa Tértio ad pacem evangelizándam et ad fídem in Província instruéndam deputátus, ab hæréticis láncea transfóssus occúbuit.
13. Plebe in Umbria, beáti Iacóbi, cognoménto Eleemosynárii, qui, iuris perítus, advocátum Páuperum et oppressórum se práebuit.
14. In território Gualdénsi item in Umbria, beáti Angeli, eremítæ.
15. In urbe Fuan Provínciæ Fujian in Sinis, sancti Francísci Fernández de Capillas, presbýteri ex Ordine Prædicatórum et mártyris, qui, cum nomen Christi in ínsulas Philippínas et in Fujian portásset, ibídem in persecutióne Tartarórum diu in custódiam coniéctus est et tandem cápite obtruncátus.
16. In vico Steyl in Nederlándia, sancti Arnóldi Janssen, presbýteri, qui ad fídem in missiónibus propagándam Societátem Verbi Divíni fundávit.
17. Berolíni in Germánia, beáti Nicolái Gross, patrisfamílias et mártyris, qui, ad rem sociálem pénitus inténtus, nefário regímini humánæ dignitáti ac religióni infénso omnímodo óbstitit, ut nihil contra Dei mandáta ágeret, quaprópter in cárcerem coniéctus per suspéndii cruciátum victóriæ Christi párticeps factus est.
Die 16 ianuárii Décimo séptimo Kalendas februárii. Luna:
1. Romæ in coemetério Priscíllæ via Salária Nova, deposítio sancti Marcélli Primi, papæ, qui, ut sanctus Dámasus refert, verídicus pastor, a lapsis dire vexátus pæniténtiam ab ipso statútam spernéntibus et tyránno flagitióse delátus, e pátria pulsus exsul óbiit.
2. Aulóne in Illýrico, sancti Danáctis, mártyris.
3. Rhinocorúræ in Ægýpto, sancti Melæ, epíscopi, qui, sub Valénte imperatóre ariáno exsílium pro fíde orthódoxa passus, in pace quiévit.
4. Areláte in Província Gálliæ, sancti Honoráti, epíscopi, qui in ínsula Lirinénsi monastérium celebérrimum instítuit et Arelaténsis Ecclésiæ régimen suscépit.
5. Tarantásiáe in Gállia Viennénsi, sancti Iacóbi, epíscopi, discípuli sancti Honoráti Lirinénsis.
6. Opitérgii in Venétia, sancti Titiáni, epíscopi.
7. In agro Turonénsi Gálliæ Lugdunénsis, commemorátio sancti Leobátii, abbátis, qui, a magístro suo sancto Urso coenóbio Senapáriæ nuper cóndito præpósitus, in summa sanctitáte et senectúte perdurávit.
8. In pago Dumbénsi territórii Lugdunénsis in Gállia, sancti Triviéri, presbýteri, mónachi tandémque eremítæ.
9. Macerácii ad Althéiam flúvium in Gállia, sancti Fúrsei, abbátis primum in Hibérnia, exínde in Anglia, dein in Gállia, ubi monastérium Latiniacénse cóndidit.
10. Bálnei in Flamínia, sanctæ Ioánnæ, vírginis, quæ, in Ordinem Camaldulénsium recépta, oboediéntia máxime ac humilitáte refúlsit.
11. Apud urbem Maróchium in Mauretánia, pássio Sanctórum mártyrum Berárdi, Othónis, Petri, presbýterorum, Accúrsii et Adiúti, religiosórum, ex Ordine Minórum, qui a sancto Francísco ad Christi Evangélium musulmánis nuntiándum missi, Híspali comprehénsi, mox Maróchium dedúcti, Maurórum príncipis iussu gládio cæsi sunt.
12. Cándii in Taprobáne ínsula Océani Indici, beáti Ioséphi Vaz, presbýteri e Congregatióne Oratórii, qui admirábili ardóre in laboriósis per campos itinéribus cathólicos disseminátos et ábditos indefésse in fíde confirmávit atque Evangélium salútis sédulo prædicávit.
13. Bríxiæ in Itália, beáti Ioséphi Antónii Tovini, qui, magíster, plures instítuit scholas christiánas et ópera pública ædificánda curávit, semper, in quæ gessit negótia, documénta oratiónis ac virtútum áfferens.
14. Valéntiæ in Hispánia, beátæ Ioánnæ Maríæ Condesa Lluch, vírginis,
quæ sollérti caritátis ac sacrifícii amóre ad inopes, púeros et iúvenes
óperarias adiuvándos húmili labóris stúdio se trádidit, pro quorum tutéla
atque institutióne Congregatiónem Ancillárum ab Immaculáta Conceptióne
Protectrícum Óperariarum fundávit. Die 17 ianuárii Sexto décimo Kalendas fehruarii. Luna:
emória sancti Antónii, abbátis, qui, paréntibus orbatus, evangelica excipíens præcépta ómnia bona distríbuit paupéribus et in solitúdinem apud Thebáidem in Ægýpto recéssit, ubi vitam ascéticam ágere coepit, Ecclésiæ roborándæ óperam navávit, fídei confessóres in persecutióne Diocletiáni imperatóris sústinens, et sanctum Athanásium contra ariános fulsit. Tantos vero hábuit discípulos, ut pater monachórum vocarétur.
2. In Cappadócia, Sanctórum Speusíppi, Elasíppi, Melasíppi, fratrum, et eórum áviæ Leoníllæ, mártyrum.
3. In Osrhoéne, commemorátio sancti Iuliáni, ascétæ, a vernáculis Sabæ, id est senis, cognomináti, qui, licet civitátis strépitus detestátus sit, diléctam solitúdinem ad tempus relíquit, ut Antiochíæ ariánæ háeresis sectatóres sédulo confúnderet.
4. Dere Vocontiórum in Gállia Lugdunénsi, sancti Marcélli, epíscopi, qui, defénsor civitátis, ob Cathólicam fídem servátam ab Eurico rege ariáno in exsílium pulsus est.
5. Apud Biturígas in Aquitánia, sancti Sulpícii, cognoménto Pii, epíscopi, qui, ex aula régia ad episcopátum promótus, nihil cárius hábuit quam curam gérere páuperum.
6. In Bavária, beáti Gamelbérti, presbýteri, qui bona sua Uthóni, quem de sacra fonte suscéperat, trádidit, ut monastérium Metheménse fundarétur.
7. Apud Forum Iúlii in Província Gálliæ, sanctæ Rosselínæ, prioríssæ Cellæ Robáudi Ordinis Cartusiénsis, quæ abnegatióne sui, cibi somníque ieiúnio et austeritáte enítuit.
8. In civitáte Tocolatlán in México, sancti Ianuárii Sánchez Delgadillo, presbýteri et mártyris in persecutióne mexicána.
Die 18 ianuárii Quinto décimo Kalendas februárii. Luna:
1. Carthágine, Sanctórum mártyrum Successi, Pauli et Lúcii, episcopórum, qui Concílio in hac civitáte hábito interfuérunt et sub Décio imperatóre passi sunt.
2. Nicáeæ in Bithýnia, Sanctórum Coscónii, Zenónis et Melaníppi, mártyrum.
3. Apud Fuxum in Gállia Narbonénsi, tránsitus sancti Volusiáni, epíscopi Turonénsis, qui, a Gothis captus, in exsílio Deo spíritum réddidit.
4. Romæ, commemorátio sanctæ Priscæ, sub cuius nómine basílica in colle Aventíno Deo dedicáta est.
5. In monastério Lutrénsi in Burgúndia, sancti Deícoli, abbátis, qui, natióne hibérnus et sancti Columbáni discípulus, coenóbium illud condidísse fertur.
6. Ferriáræ in Æmilía, beátæ Beatrícis Esténsis, moniális, quæ, cóniuge defúncto et principátu sáeculi abdicáto, Deo in monastério ab ipsa sub Régula sancti Benedícti fundáto se dicávit.
7. Apud Budam in Hungária, sanctæ Margarítæ, vírginis, quæ, fília Belæ regis Quarti, a paréntibus pro pátriæ liberatióne a Tártaris Deo vota et infans moniálibus Ordinis Prædicatórum trádita, adhuc duodénnis professióne religiósa ita Dómino totam se cóntulit, ut Christo Crucifíxo impigre studúerit assimilári.
8. Cremónæ in Langobárdia, beáti Fácii, qui, áurifex, ex pátria Veronénsi huc migrávit, pæniténtiæ, peregrínatiónibus et ægrotórum solámini magnópere déditus.
9. Morbínii in Alpibus, beáti Andréæ de Piscária Grego, presbýteri ex Ordine Prædicatórum, qui pédibus totam regiónem diu peragrávit, parce vivens iuxta páuperes et ómnium ánimos fratérne sibi concílians.
10. Aquilæ in Aprútio, beátæ Christínæ (Matthíæ) Ciccarelli, Vírginis ex Ordine Sancti Augustíni.
11. Braunsbérgre in Borússia, beátæ Regínæ Protmann, vírginis, quæ, amóre páuperum capta, in egenórum servítium magnópere incúbuit et Congregatiónem Sorórum Sanctæ Catharínæ fundávit.
12. Apríliaci apud Andégavum in Gállia, beatárum Felicitátis Pricet, Mónicæ Pichery, Cárolæ Lucas et Victóriæ Gusteau, mártyrum, quæ, gállica perturbatióne sæviénte, in ódium Christiánæ religiónis plumbis cæsæ sunt.
13. Cássiæ in Itália, beátæ Maríæ Terésiæ (Maríæ Ioánnæ) Fasce, abbátissæ monastérii Ordinis Sancti Augustíni, quæ ascésim ac contemplátionem cum opéribus summópere coniúnxit erga peregrínos et indigéntes conficiéndis.
Die 19 ianuárii
1. Smyrnæ in Asia, pássio sancti Germánici, mártyris Philadelphíæ, qui, témpore Marci Antoníni et Lúcii Aurelíi imperatórum, sancti Polycárpi discípulus fuit, quem in martýrio præcéssit, cum, primáevæ ætátis venustáte florénte a iúdice damnátus, Dei virtúte metum corpóreæ suæ fragilitátis exclúdens béstiam ipsi parátam sponte provocávit.
2. Apud Spolétum in Umbria, sancti Pontiáni, mártyris, qui, témpore Antoníni imperatóris, pro Christo vehementíssime virgis cæsus esse tráditur, tandem gládio transfóssus.
3. Via Cornélia miliário Tértio décimo ab urbe Roma in coemetério ad Nymphas, Sanctórum Márii, Marthæ, Audífacis et Abaci, mártyrum.
4. Commemorátio sancti Marcárii Magni, presbýteri et abbátis monastérii Scetis in Ægýpto, qui, mundo sibíque mortuus, Deo soli vivebat, quod étiam suos docébat.
5. Commemorátio sancti Marcárii, cognoménto Alexandríni, presbýteri et abbátis apud montem Scetim in Ægýpto.
6. Laude Pompéia in Ligúria, commemorátio sancti Bassiáni, epíscopi, qui, ut gregem suum ab ariánorum hǽresi ibídem adhuc vigénte defénderet, una cum sancto Ambrósio Mediolanénsi strénue decertávit.
7. Comi in Langobárdia, sanctárum Liberátæ et Faustínæ, Sorórum et vírginum, quæ monastérium Sanctæ Margarítæ condidérunt.
8. In pago Dorcasíno apud Carnútum in Néustria, sancti Launomári, abbátis monastérii Corbionénsis, quod in Pértici solitúdine fundávit.
9. Ravénnæ in Flamínia, sancti Ioánnis, epíscopi, qui dum bello langobárdico tota quatiebátur Itália, Ecclésiæ necessitátibus óptime provídit, sancto Gregório papa Magno teste, qui ad eum librum Régulæ pastorális misit.
10. Róthomagi in Néustria, sancti Remígii, epíscopi, Pippíni regis fratris, qui sollérti indústria psalmódiáe cantum more románo modulári curávit.
11. Corcýræ in Gráecia, sancti Arsénii, epíscopi, qui pastor fuit ovíli inténtus et oratióni noctúrnæ assíduus.
12. Híspali in Hispánia, beáti Marcélli Spínola y Mæstre, epíscopi, qui ad societátem humánam provehéndam círculos operariórum cóndidit, pro veritáte et æquitáte propugnávit et domum suam egénis apéruit.
Die 20 ianuárii
ancti Fabiáni, papæ et mártyris, qui láicus ad pontificátum divínitus est vocátus, et fídei ac virtútis gloriósum práebens exémplum, in persecutióne Décii imperatóris passus est; de eiúsdem agóne gratulátur sanctus Cypriánus quod in regénda Ecclésia irreprehensíbile illustréque testimónium perfecísset. Eius corpus Romæ via Appia in coemetério Callísti hac die depósitum est.
ancti Sebastiáni, mártyris, qui, ex Medioláno oriúndus, ut refert sanctus Ambrósius, Romam proféctus est, quando persecutiónes acérbæ fervébant, ibíque passus est; itaque in Urbe, quo hospes advénerat, domicílium immortálitatis perpétuæ obtínuit. Eius deposítio item Romæ ad Catacúmbas hac eádem die evénit.
3. Apud Antínoen in Thebáide, sancti Asclæ, mártyris, qui coram práeside minas non tímuit, cum maior ei formído Christum contémnere esset, et post vária torménta in flumen præcipitátus est.
4. Nicáeæ in Bithýnia, sancti Neóphyti, mártyris.
5. In Palæstína, sancti Euthýmii, abbátis, qui, natióne arménus et ab infántia Deo consecrátus, Hierosólymam pétiit et, plúrimis annis in solitúdine exáctis, ad extrémum vitæ usque firmus et álacer in humilitáte et caritáte, observántia disciplínæ clarus óbiit.
6. Vigórniæ in Anglia, sancti Wulfstáni, epíscopi, qui, e claustro hanc ad sedem episcopálem evéctus, monásticos mores cum zelo pastoráli coniúnxit, summam impéndens curam in parcóecias visitándas, in ecclésiarum erectiónem incitándam, in lítteras fovéndas, necnon in venalícia exprobránda.
7. Coltibóni in Etrúria, beáti Benedícti Ricasoli, eremítæ e Congregatióne Vallis Umbrósæ.
8. In Fínnia, sancti Henríci, epíscopi et mártyris, qui, in Anglia natus, Upsaliénsem Ecclésiam suscépit regéndam omni stúdio in Finnos evangelizándos incúmbens; crudéliter tandem ab homicída trucidátus est, quem iuxta ecclésiasticam disciplínam corrígere conátus erat.
9. Messánæ in Sicília, sanctæ Eustóchii Calafato, vírginis, abbátissæ ex Ordine Sanctæ Claræ, quæ ad prístinam vitæ régularis disciplínam restaurándam et Christi sequélam e sancti Francísci more fovéndam omni stúdio se cóntulit.
10. Seuli in Coréa, sancti Stéphani Min Kǔk-ka, mártyris, qui, catechísta, in cárcere pro fíde christiána iugulátus est.
12. In monastério Montis Sancti Bernárdi apud Licéstriam in Anglia, beáti Cypriáni (Michaélis) Iwene Tansi, presbýteri ex Ordine Cisterciénsi, qui, in território Onitsháno Nigériæ natus, adhuc puer, invíta família, christiánam fídem proféssus est et sacérdos ordinátus magna cum sedulitáte pastoráli curæ se cóntulit, donec mónachus efféctus sancta morte sanctam vitam consummáre méruit.
Die 21 ianuárii
emória sanctæ Agnétis, vírginis et mártyris, quæ, adhuc puélla, Romæ suprémum fídei óbtulit testimónium et títulum castitátis martýrio consecrávit; nam et ætátem vicit et tyránnum, amplíssimam apud gentes admiratiónem acquisívit, plus étiam maiórem apud Deum glóriam cumulávit. Hac die deposítio córporis celebrátur.
2. Commemorátio sancti Públii, epíscopi Athenárum, qui Christo martýrii testimónium dedit.
3. Tarracóne in Hispánia Citerióre, pássio Sanctórum mártyrum Fructuósi, epíscopi, Augúrii et Eulógii, eius diaconórum, qui, sub Valeriáno et Galliéno imperatóribus, post fídei confessiónem coram Æmilíano procuratóre in amphitheátrum addúcti sunt, ubi, prece ab epíscopo fidélibus adstántibus clara voce pro pace Ecclésiæ adhíbita, flammis iniécti et génibus nixi deprecántes martýrium complevérunt.
4. Trecis in Gállia Lugdunénsi, sancti Pátrocli, mártyris.
5. Pápiæ in Ligúria, sancti Epiphánii, epíscopi, qui, témpore incursiónum barbarórum, de pópulorum reconcliatióne, de captívis rediméndis necnon de civitáte ipsa evérsa reficiénda summópere laborávit.
6. In móntibus circa lacum Turicénsem apud Helvétios, sancti Meginrádi, presbýteri, qui, coenobíticæ primum, dein eremíticæ vitæ inténtus, a latrónibus interféctus est.
7. In monte Mercúrio in Lucánia, sancti Zacharíæ, Angélici nuncupáti, magístri coenobíticæ convérsatiónis.
8. Londínii in Anglia, beatórum Eduárdi Stransham et Nicolái Wheeler, presbýterorum et mártyrum, qui, sub Elísabeth regína Prima propter sacerdótium cápite damnáti, Tybúrni martýrium subiérunt.
9. Londínii in Anglia, sancti Albáni Roe, ex Ordine Sancti Benedícti, et beáti Thomæ Green, presbýterorum et mártyrum, qui, sub Cárolo rege Primo, alter post septem et decem annos in cárcere peráctos, alter post quattuórdecim, iam senectúte confécti simul pro Christo Tybúrni patíbulo suspénsi sunt.
10. In monastério Beniganiménsi in pago Valentíno Hispániæ, beátæ Ioséphæ Maríæ a Sancta Agnéte, vírginis ex Ordine Discalceatárum Sancti Augustíni.
11. Valle Guidónis in Gállia, beatórum presbýterorum Ioánnis Baptístæ Turpin du Cormier et tredècim sociórum,1 mártyrum, qui ob strénuam Ecclésiæ Cathólicæ fidelitátem in gállica perturbatióne cápite truncáti sunt. 12. In pago Dægu in Coréa, sancti mártyris Ioánnis Yi Yun-il qui, paterfamílias, agrícola et catechísta, superátis verbéribus membrorúmque luxatióne, constans in christiána fíde permánsit et æquo ánimo cápitis abscissióne martýrium adéptus est, última magnæ persecutiónis in hac natióne patrátæ víctima.
Die 22 ianuárii
ancti Vincéntii, diáconi Cæsaraugustáni et mártyris, qui in persecutióne Diocletiáni imperatórisæ cárceres, famem, ecúleum laminásque candéntes perpéssus, Valéntiæ in Hispánia Cartháginénsi invíctus ad martýrii práemium evolávit in cælum.
2. Item commemorátio sancti Valérii, epíscopi Cæsaraugustáni in Hispánia Tarraconénsi, qui Concílio Ilíiberitáno Primo intérfuit et, una cum sancto Vincéntio Valéntiam dedúctus, in exsílium pulsus est.
3. Nováriæ in Ligúria, sancti Gaudéntii, qui primus illíus sedis epíscopus habétur.
4. Sergiópoli in Pérside, pássio sancti Anastásii, mónachi et mártyris, qui post plúrima torménta, quæ in Cæsaréa Palæstínæ perpéssus erat, a Chósroe Persárum rege multis poenis afféctus, post septuagínta sócios, prope flumen suffocátus et cápite truncátus est.
5. In monastério Romanénsi ad Isaram flumen in Alpibus, deposítio sancti Barnárdi, epíscopi Viennénsis, qui, cum e Cároli Magni imperatóris milítia ad milítiam Christi se contulísset, opes a patre accéptas in páuperes erogávit et duo exstrúxit coenóbia, Ambroniacénse et Romanénse, ubi vitæ cursum exégit.
6. Soræ in Látio, sancti Domínici, abbátis, qui monastéria váriis in Itáliæ regiónibus cóndidit aliáque suo reformatiónis spíritu ad régularem vitam réddidit.
7. Pisis in Etrúria, beátæ Maríæ Mancini, quæ, bis víduata omnique orbáta prole, adhortánte sancta Catharína Senénsi, vitam commúnem in monastério Sancti Domínici instítuit, cui decem annos práefuit.
8. Comi in Langobárdia, beáti Antónii della Chiesa, presbýteri ex Ordine Prædicatórum, qui in nonnúllis Ordinis convéntibus vitam régularem restítuit, humánam fragilitátem indulgéntia prósequens et firmitáte eméndans.
9. Londínii in Anglia, beáti Guliélmi Patenson, presbýteri et mártyris, qui, sub Elísabeth regína Prima propter sacerdótium cápite damnátus, étiam in cárcere sex secum deténtos Ecclésiæ reconciliávit et postrémo Tybúrni ferro disséctus martýrium complévit.
10. In Tunquíno, Sanctórum Francísci Gil de Federich et Mattháei Alonso de Leziniana, presbýterorum ex Ordine Prædicatórum et mártyrum, qui, regnánte Trinh Doanh, post constántem et in vínculis ipsis peráctam Evangélii prædicatiónem, gládio percússi gloriósam pro Christo mortem obiérunt.
11. Romæ, sancti Vincéntii Pallotti, presbýteri, fundatóris Societátis Apostolátus Cathólici, qui scriptis operibúsque ómnium in Christo baptizatórum vocátionem ad óperam pro Ecclésia náviter erogándam incitávit.
12. Burdígalæ in Gállia, beáti Guliélmi Ioséphi Chaminade, presbýteri, qui, zelo pastoráli in occúlto diu audácter exército, fidéles láicos pro beátæ Maríæ Vírginis cultu et missiónibus éxteris promovéndis congregáre stúduit, quaprópter et Institútum Filiárum a María Immaculáta et Societátem Maríæ fundávit.
13. In pago Junin Andárum in Argentína, beátæ Lauræ Vicũna, vírginis, quæ, in urbe Sancti Iacóbi in Chília nata, alúmna in Institúto Maríæ Auxiliatrícis, pro matris convérsióne Tértio décimo ætátis anno vitam Deo óbtulit.
14. In Parvo Castéllo Gardæ in Itália, beáti Ioséphi Nascimbeni, presbýteri, fundatóris Institúti Parvárum Sorórum a Sacra Família.
15. Vindobónæ in Austria, beáti Ladislái Batthyány-Strattmann, qui, paterfamílias, tum in família cum in civíli societáte vitæ et óperum sanctitáte Evangélium testíficans, médici nomen et dignitátem vero christiáno more cóluit et magna cum caritáte óperam ægrótis assidéndo navávit, pro quibus valetudinária fundávit, ubi, omni vanitáte neglécta, páuperes inopésque tantum excipiébat.
Die 23 ianuárii
1. Cæsaréæ in Mauretánia, Sanctórum mártyrum Sevériani et Aquilæ, cóniugum, qui igne combústi sunt.
2. Romæ via Nomentána in coemetério Maióre, sanctæ Emerentiánæ, mártyris.
3. Ancýræ in Galátia, Sanctórum Cleméntis, epíscopi, et Agathángeli, mártyrum.
4. Theáni in Campánia, commemorátio sancti Amásii, epíscopi.
5. Toléti in Hispánia, sancti Hildephónsi, epíscopi, qui, mónachus et coenóbii rector, antístes eléctus est atque plúrimos luculentióre sermóne scripsit libros, preces litúrgicas insígnes exarávit et miro devótiónis zelo beátam Maríam Dei Genetrícem et semper Vírginem excóluit.
6. Domnipétræ in território Bisuntíno in Burgúndia, sancti Maimbódi, qui, natióne hibérnus, peregrínus efféctus et eremíta, a latrónibus occísus esse tráditur.
7. Seuli in Coréa, sancti Andréæ Chong (Tyong) Hwa-gyŏng, catechístæ et mártyris, qui, sancto epíscopo Lauréntio Imbert auxílium præstans, domum suam refúgium christianórum fecit, quaprópter íctibus sæve cæsus est ac tandem in cárcere láqueo interémptus.
Die 24 ianuárii
emória sancti Francísci de Salès, epíscopi Genevénsis et doctóris Ecclésiæ, qui, verus pastor ánimarum, ad communiónem Cathólicam plúrimos fratres ab ea seiúnctos addúxit, devótiónem amorémque Dei scriptis christiános edócuit atque Ordinem Visitatiónis cum sancta Ioánna de Chantal instítuit; Lugdúni vero in humilitáte degens ánimam Deo réddidit die duodetrigésima decémbris et hac die Annécii depósitus est.
2. Fulgínii in Umbria, sancti Feliciáni, qui primus epíscopus huius regiónis habétur.
3. In pago Trecénsi in Gállia Lugdunénsi, sancti Sabíniáni, mártyris.
4. Antiochíæ in Sýria, pássio sancti Bábylæ, epíscopi, qui, in persecutióne Décii imperatóris, postquam frequénter pássionibus suis ac cruciátibus glorificáverat Deum, gloriósum vitæ finem sortítus est in férreis vínculis, quibúscum corpus suum et sepelíri mandávit. Cum eo étiam passi referúntur púeri tres, scílicet Urbánus, Prilidánus et Epolónus, quos ille in Christi fíde instrúxerat.
5. Cinguli in Picéno Itáliæ, sancti Exsuperántii, epíscopi.
6. Bináci prope Mediolánum in Langobárdia, beátæ Paulæ Gambara Costa, víduæ, quæ, Tértio Ordini Sancti Francísci adscrípta, violéntum cóniugem patiénter tolerávit et ad convérsiónem duxit atque caritátem in páuperes semper insígniter exércuit.
7. Londínii in Anglia, beatórum mártyrum Guliélmi Ireland, presbýteri e Societáte Iesu, et Ioánnis Grove, eius fámuli, qui, sub Cárolo rege Secúndo proditiónis crímine falso insimuláti, Tybúrni pro Christo martýrium subiérunt.
8. In vico Sainville in pago Gálliæ Carnuténsi, beátæ Maríæ Poussepin, vírginis, quæ ad pastóres animárum adiuvándos, ad puéllas erudiéndas necnon ad egénos ægrotósque iuvándos Institútum Sorórum Dóminicarum a Caritáte a Præsentatióne Beátæ Maríæ Vírginis fundávit.
9. In vico Pratulin in pago Siedlecénsi Polóniæ, beatórum Vincéntii Lewoniuk et duódecim sociórum,2 mártyrum, qui, nec minis nec illecébris commóti, ab Ecclésia Cathólica discédere noluérunt ac dénique paroeciæ suæ claves trádere respuéntes inérmes occísi sunt vel ad mortem vulneráti.
10. Romæ, beáti Timóthei (Ioséphi) Giaccardo, presbýteri, qui in Pia Societáte a Sancto Paulo plúrimos instítuit discípulos ad mundo Evangélium nuntiándum, opportúnis adhíbitis communicatiónis sociális instruméntis.
Die 25 ianuárii
estum Convérsiónis sancti Pauli, Apóstoli, cui, apud Damáscum cum iter faceret, adhuc spirans minis et cæde in discípulos Dómini, ipse Iesus in via se gloriósum revelávit eúmque elégit, ut, Spíritu Sancto replétus, Evangélium salútis in géntibus nuntiáret, pro Christi nómine multa pátiens.
2. Commemorátio sancti Anániæ, qui, discípulus Dómini, Damásci
Paulum conversum baptizávit.
3. Putéolis in Campánia, sancti Arthématis, mártyris. 4. Carthágine, sancti Agiléi, mártyris, in cuius die natáli in ipsíus basílica sanctus Augustínus tractátum de eo ipso ad pópulum hábuit.
5. Naziánzi in Cappadócia, natális sancti Gregórii, epíscopi, cuius memória die secunda ianuárii ágitur.
6. Commemorátio sancti Bretanniónis, epíscopi Tomitáni in Scýthia, qui sub Valénte imperatóre ariáno, cui fórtiter réstitit, mira sanctitáte et zelo Cathólicæ fídei flóruit.
7. Tabennési in Thebáide Ægýpti, sancti Paláemonis, anachorétæ, qui, oratióni austeritatibúsque assíduis déditus, magíster fuit sancti Pachómii.
8. Arvérnæ in Aquitánia, Sanctórum Præiécti, epíscopi, et Amaríni, viri Dei, qui ambo a procéribus eiúsdem urbis trucidáti sunt.
9. Marciánæ in Flándria, sancti Poppónis, abbátis Stabulénsis et Malmundariénsis, qui in multis monastériis Lotharíngiæ observántiam Cluniacénsem diffúdit.
10. Ulmæ in Suévia Germániæ, beáti Henríci Susa, presbýteri ex Ordine Prædicatórum, qui moléstias et ægritúdines innúmeras patiénter tolerávit, tractátum de ætérna sapiéntia compósuit et suavíssimum nomen Iesu assídue prædicávit.
11. Amándulæ in Picéno Itáliæ, beáti Antónii Migliorati, presbýteri ex Ordine Eremitárum Sancti Augustíni.
12. Mántuæ in Langobárdia, beátæ Archángelæ (Eleonóræ) Girlani, vírginis ex Ordine Carmelitárum, prioríssæ convéntus Parménsis et coenóbii Mantuáni fundatrícis.
13. Dertósæ in Hispánia, beáti Emmanuélis Domingo y Sol, presbýteri,
qui Societátem Sacerdótum Operariórum ad vocátiones sacerdotáles fovéndas
instítuit. 14. Alexandríæ in Itália, beátæ Maríæ Antóniæ (Terésiæ) Grillo, religiósæ, quæ, vídua effécta, necessitátes Páuperum miséricors suscépit et, ómnibus, quæ habébat, vénditis, Congregatiónem Parvárum Sorórum a Divína Providéntia instítuit.
15. Intra castra deténtiónis Dacháni prope Monáchium Bavariáe in Germánia, beáti Antónii Świadek, presbýteri et mártyris, qui, belli témpore, in fíde defendénda coram sectatóribus doctrínarum humánam omnem et christiánam dignitátem denegántium immarcescíbilem accépit corónam.
Die 26 ianuárii
Memória Sanctórum Timóthei et Titi, episcopórum, qui, discípuli sancti Pauli Apóstoli et adiutóres eius in apostolátu, alter Ecclésiæ Ephesínæ, alter vero Creténsi práefuit; quibus inscríptæ sunt epístulæ, quæ sapiéntes præbent admonitiónes pro pastórum et fidélium institutióne.
2. Hippóne Régio in Numídia, sancti Theógenis, mártyris, de quo sanctus Augustínus sermónem hábuit.
3. Apud Béthlehem Iudæ, dormítio sanctæ Paulæ, víduæ, quæ, e nobilíssimo senatórum génere, sáeculo renuntiávit et, ópibus paupéribus distribútis, cum beáta vírgine Eustóchio, fília sua, ad præsépe Dómini se recépit.
4. Hierosólymæ, Sanctórum Xenofóntis et Maríæ eórumque filiórum Ioánnis atque Arcádii, qui, senatória dignitáte amplissimísque possessiónibus abdicátis, monásticam vitam in Civitáte Sancta pari animórum ardóre proféssi esse narrántur.
5. Cistércii in Burgúndia, sancti Alberíci, abbátis, qui inter primos mónachos Molisménses ad Novum Monastérium venit, quod dein abbas eléctus rexit, omni stúdio et cura ad institúta monachórum énitens tamquam verus Régulæ et fratrum amátor.
6. Nidarósiæ in Norvégia, sancti Augustíni (Eystein) Erlandssön, epíscopi, qui Ecclésiam ipsi commíssam, quam valde contra príncipes deféndit, summa cum sedulitáte auxit.
7. Andégavi in Gállia, beátæ Maríæ de la Dive, mártyris, quæ, vídua effécta, in gállica perturbatióne propter fidelitátem Ecclésiæ servátam decolláta est.
8. Prope Monáchium Bavariáe in Germánia, beáti Michaélis Kozal, epíscopi auxiliaris Vladislaviénsis et mártyris, qui pro fídei defensióne et Ecclésiæ libertáte sub nefário regímine nazistárum tres annos invícta patiéntia in campo exitíi intra castra deténtiónis Dacháni relegátús est, donec martýrium consummávit.
Die 27 ianuárii
anctæ Angelæ Merici, vírginis, quæ primum Tértii Ordinis Sancti Francísci hábitum sumpsit et puéllas congregávit, quas in opéribus caritátis instrúeret, dein, sanctæ Ursulæ nómine, Ordinem instítuit mulíerum, cui munus commísit vitæ perféctæ in mundo coléndæ et adulescéntulas in viis Dómini instituéndi; Bríxiæ demum in Langobárdia réddidit ánimam.
2. Soræ in Látio,
commemorátio sancti Iuliáni, mártyris, qui témpore Antoníni imperatóris
passus esse narrátur. 3. Apud Cenomanum in Gállia Lugdunénsi, sancti Iuliáni, qui eiúsdem urbis primus epíscopus habétur.
4. Mariánæ in ínsula Córsica, commemorátio sanctæ Devótæ, vírginis et mártyris.
5. In monastério Bodacénsi in agro Gálliæ Sistariénsi, sancti Márii, abbátis.
6. Romæ apud sanctum Petrum, deposítio sancti Vitaliáni, papæ, qui salúti Anglórum peculiári stúdio consúluit.
7. Ternodóri in Burgúndia, tránsitus sancti Theodórici, epíscopi Aurelianénsis, qui ad límina Apostolórum iter agens e vita decéssit.
8. Apud Carnútum in Gállia, tránsitus sancti Gilduíni, diáconi Dolénsis in Británnia Minóre, qui, adhuc aduléscens epíscopus eléctus, tantum honórem coram sancto Gregório papa Séptimo útpote indígnus réspuit et, Roma dein revértens, in fínibus huius regiónis fébribus corréptus terrénam perfécit peregrínatiónem.
9. Taruánnæ item in Gállia, beáti Ioánnis, epíscopi, qui, canónicus Régularis, sedem Morinénsem suscépit, in qua trigínta ámplius annos simoníacis óbstitit et octo monastéria tam Canonicórum quam monachórum fundávit.
10. Ripæ Sancti Vitális prope Cómum in Langobárdia, beáti Manfrédi Settala, presbýteri et eremítæ.
11. Andégavi in Gállia, beátæ Rosáliæ du Verdier de la Soriniére, vírginis in monastério Calvárii eiúsdem civitátis et mártyris, quæ, gállica perturbatióne sæviénte, in ódium Christiánæ religiónis cápitis damnáta est.
12. Prope Mengo in Ugánda, pássio sancti Ioánnis Maríæ, propter ánimi maturitátem Muzei seu Senis cognomináti, qui, regis fámulus, christiánus factus e persecutióne effúgere nóluit, sed sponte coram primo regis Mwenga adminístro Christi fídem proféssus est, quare cápite obtruncátus occúbuit, última huius persecutiónis víctima.
13. In óppido Gilet in Valéntia Hispániæ Província, sancti Henríci de Ossó y Cervelló, presbýteri, qui, ad puéllarum institutiónem provehéndam Societátem Sanctæ Terésiæ fundávit, ex qua póstea amótus, in convéntu Fratrum Minórum réliquos vitæ annos exégit.
14. Káunæ in Lithuánia, beáti Geórgii Matulaitis, epíscopi Vilnénsis ac dein missi apóstolici in Lithuánia, qui Congregatiónem Clericórum Maríanorum atque Congregatiónem Sorórum Páuperum ab Immaculáta Conceptióne Beátæ Maríæ Vírginis fundávit.
Die 28 ianuárii
emória sancti Thomæ de Aquíno, presbýteri ex Ordine Prædicatórum et Ecclésiæ doctóris, qui, summis intelléctus donis práeditus, oratiónibus et scriptis exímiam sapiéntiam suam áliis trádidit. Ad Concílium Ecuménicum Lugdunénse Secúndum ab ipso beáto Gregório papa Décimo vocátus iter fáciens, in monastério Fossænóvæ in Látio die séptima mártii óbiit et multis post annis hac die corpus eius Tolósam translátum est.
2. In monastério Reomáensi apud Língones in Néustria, sancti Ioánnis, presbýteri, viri Deo devóti, qui mónachos sub Régula sancti Marcárii congregávit.
3. Commemorátio sancti Iacóbi, eremítæ in Palæstína, qui pæniténtiæ causa diu in sepúlcro latuit.
4. Conchæ Valériæ in Nova Castélla Hispániæ, sancti Iuliáni, epíscopi, qui, secúndus antístes post recuperátam a Mauris civitátem Ecclésiam illustrávit, in páuperes bona Ecclésiæ érogans et ópera mánuum victum cotidiánum sibi cómparans.
5. Apud Sanctum Frediánum prope Pisas in Etrúria, beáti Bartholomáei Aiutamicristo, religiósi ex Ordine Camaldulénsium.
6. In vico Plevin
in Británnia Minóre Gálliæ regióne, beáti Iuliáni Maunoir, presbýteri
e Societáte Iesu, qui tam in pagis et vicis quam in úrbibus huius Provínciæ
quadragínta duos annos missiónibus totum se devóvit.
7. In urbe Maokou Provínciæ Guizhou in Sinis, sanctórum Agathæ Lin Zhao, vírginis, Hierónymi Lu Tingmei et Lauréntíi Wang Bing, mártyrum, qui, catechístæ, sub imperatóre Wenzongxian ut christiáni deláti sunt et demum cápite truncáti. 8. In urbe Daijiazhuang in Província Shandong meridionáli Sinárum, sancti Ioséphi Freinademetz, presbýteri e Societáte a Verbo Divíno, qui ad opus evangelizatiónis in hac regióne indefésse adlaborávit.
9. In civitáte Picassent in pago Valentíno Hispániæ, beátæ Maríæ Aloýsiæ Montesinos Ordũna, vírginis et mártyris, quæ, persecutióne erga fídem sæviénte, per martýrium victóriæ Christi párticeps facta est.
10. In campo deténtiónis óppidi Kharsk prope Tomíscum in Sibiriána Rússiæ Província, beátæ Olýmpiæ (Olgæ) Bída, vírginis e Congregatióne Sorórum Sancti Ioseph et mártyris, quæ in regímine persecutiónis erga fídem pro Christi amóre ómnia tolerávit advérsa.
Die 29 ianuárii
1. Edéssæ in Osrhoéne, Sanctórum mártyrum Sarbélii, presbýteri, et Bebáiæ, soróris eius, qui a sancto Barsimáeo epíscopo ad baptísmum ducti et pro Christo passi esse ferúntur.
2. Romæ via Nomentána in coemetério Maióre, Sanctórum mártyrum Pápiæ et Mauri, mílitum.
3. Perúsiæ in Umbria, sancti Constántii, epíscopi.
4. Antiochíæ in Sýria, Sanctórum Iuventíni et Máximini, mártyrum, qui sub Iuliáno imperatóre Apóstata martýrio coronáti sunt.
5. Tréviris in Gállia Bélgica, sancti Valérii, epíscopi, qui secúndus hanc sedem ténuit.
6. Prope Antíochiam in Sýria, sancti Aphraátis, anachorétæ, qui, apud Persas natus atque institútus, magórum vestígia pérsequens in Béthlehem ad Dóminum se convértit et Edéssam petens in domúnculam extra moenia se recépit, Antiochíæ demum Cathólicam fídem advérsus ariános prædicatióne et scriptis deféndit.
7. In Británnia Minóre, sancti Gildæ, cognoménto Sapiéntis, abbátis, qui de excídio Británnia e scripsit, pópuli sui calamitátes plorans ac príncipum cleríque pravitátem íncrepans, et Rhuvigiénse monastérium in prospéctu maris condidísse et in ínsula Horáta obiísse fertur.
8. Apud Biturígas in Aquitánia, sancti Sulpícii Sevéri, epíscopi, e senatóribus Gálliarum, cuius sapiéntiam, pastorálem curam et instaurándæ disciplínæ stúdium sanctus Gregórius Turonénsis laudávit.
9. Floréntiæ in Etrúria, beátæ Villánæ de Bottis, matrisfamílias, quæ, a vita mundána descíscens, hábitum Sorórum de Pæniténtia Sancti Domínici impetrávit atque Christi crucifíxi meditatióne et austéra vivéndi ratióne enítuit, stipem pro paupéribus étiam in viis mendícans.
10. In urbe Bialostocénsi in Polónia, beátæ Boleslávæ Maríæ Lament, vírginis, quæ inter rerum publicárum mutatiónes Congregatiónem Sorórum Missionariárum a Sacra Família cóndidit pro unitáte christianórum fovénda, derelíctis adiuvándis, necnon puéllis christiáne instituéndis.
Die 30 ianuárii
1. Hierosólymæ, sancti Matthíæ, epíscopi, qui, multa pro Christo perpéssus, demum in pace quiévit.
2. Edéssæ in Osrhoéne, sancti Barsimáei, epíscopi, qui pro Christi fíde sub Décio imperatóre verbéribus afféctus esse refértur, sed, exácta persecutióne, e cárcere dimíssus réliquum vitæ tempus in Ecclésiæ ipsi commíssæ régimen summam impendisse óperam.
3. Romæ, commemorátio sanctæ Martínæ, sub cuius título Donus papa basílicam in foro románo dedicávit.
4. Calæ ad Mátronam in pago Gálliæ Parisiénsi, sanctæ Bathíldis, quæ, regína, coenóbia sub Régula sancti Benedícti ex more Luxoviénsi fundávit, post cóniugis Clodovéi Secúndi mortem Francórum regni gubernácula suscépit et, fílio regnánte, novíssimos annos sub íntegra religiónis régula convérsata est.
5. Malbódii in Néustria, sanctæ Aldegúndis, abbátissæ, témpore Dagobérti regis.
6. Pápiæ in Langobárdia, sancti Armentárii, epíscopi, qui corpus sancti Augustíni, a rege Liutprándo translátum, sollémniter in basílica Sancti Petri in Cælo Aureo repósuit.
7. Pássio sancti Theóphili, cognoménto Iúvenis, mártyris, qui præféctus classis christianórum, ab hóstibus apud Cyprum captus et ad ‘Arun suprémum Saracenórum príncipem perdúctus, cum nec donis nec minis ut Christum negáret flecti posset, gládio cæsus est.
8. Burgis in Vétere Castélla Hispániæ regióne, sancti Adelélmi,
abbátis, qui sacéllum Sancti Ioánnis una cum xenodochío in formam monastérii
convértit. 9. Eblánæ in Hibérnia, tránsitus beáti Francísci Taylor, mártyris, qui, paterfamílias, septem annos cárcerem propter fídem cathólicam perpéssus, tribulátionibus et senectúte corréptus sub Iacóbo rege Primo martýrium complévit.
10. Vitérbii in Túscia, sanctæ Hyacínthæ Mariscotti, vírginis e Tértio Ordine Régulari Sancti Francísci, quæ, quindécim annos in inánibus delectamentis versata, aspérrimam ampléxa est convérsatiónem et confraternitátes excitávit ad senes consolándos et ad sanctam Eucharístiam adorándam.
11. Augústæ Taurinórum in Subalpínis, beáti Sebastiáni Valfré,
presbýteri e Congregatióne Oratórii, qui in páuperes, infírmos et deténtos
in carcéribus adiuvándos se totum impéndit et amicítia enixáque caritáte
multos ad Christum perdúxit. 12. Seuli in Coréa, sancti mártyris Pauli Hŏ Hyŏb, qui, miles, propter fídei professiónem comprehénsus et cruciátibus afféctus, víribus defíciéntibus, labi visus est, sed cum pænituisset, statim coram iúdice fídem Christi confirmávit, quare post diutúrnum cárcerem íctibus fractus occúbuit.
13. In Tunquíno, sancti Thomæ Khuong, presbýteri et mártyris, qui, in persecutióne Tu Dúc imperatóris christiánum se esse invícto ánimo proféssus, in custódiam tráditus est et ante crucem génibus nixus secúri interféctus.
14. Guadalaxáræ in México, sancti Dávidis Galvan, presbýteri et mártyris, qui in persecutióne mexicána, quod sanctitátem matrimónii vindicavísset, a mílite sine iudício plumbis cæsus gloriósam corónam adéptus est.
15. Malónnæ in Bélgio, sancti Muciáni Maríæ (Aloýsii) Wiaux, fratris Scholárum Christianárum, qui totam fere vitam summa constántia ac perpétua alacritáte in educándos iúvenes incúbuit.
16. In monastério Sancti Benedícti de Maretíolo item in Bélgio, beáti Colúmbæ (Ioséphi) Marmion, qui, in Hibérnia natus, sacerdótio auctus et abbas in Ordine Sancti Benedícti dein efféctus, ut coenóbii pater et animárum ductor sanctitáte vitæ, spiritáli doctrína et eloquéntia enítuit.
17. In vico Torrent in Hispánia, beátæ Carmélæ García Moyón, mártyris, quæ, férvida doctrínæ Christiánæ præcéptrix, in persecutióne religiósa ob Christi fídem violáta et adhuc viva concremáta est.
18. In civitáte Gdeszyn in Polónia, beáti Sigismúndi Pisarski, presbýteri et mártyris, qui in bello ob fídem ante persecutóres mínime abdicátam apud paroeciam loci plumbis occísus est.
Die 31 ianuárii
emória sancti Ioánnis Bosco, presbýteri, qui púeritiam egit ásperam et, sacérdos ordinátus, in adulescéntium institutiónem omnes vires cóntulit atque Societátem Salèsianam ac, sancta María Dóminica Mazzarello adiuvánte, Institútum Filiárum Maríæ Auxiliatrícis fundávit, pro iuventúte ártibus et christiána vita instruénda. Augústæ Taurinórum in Itália hac die, multis in eo perféctis opéribus, pie ad dapes ætérnas migrávit.
2. Corínthi in Acháia, Sanctórum mártyrum Victoríni, Victóris, Nicéphori, Cláudii, Diodóri, Serapiónis et Pápiæ, qui sub Décio imperatóre váriis supplíciis martýrium complevísse narrántur.
3. Commemorátio sancti Metráni, mártyris Alexandríæ in Ægýpto, quem adstántes sub Décio imperatóre, cum, pagánis iubéntibus, ímpia verba proférre noluísset, ferociter collisérunt et extra urbem lapídibus oppréssum interemérunt.
4. Item Alexandríæ, sanctórum mártyrum Cyri et Ioánnis, qui pro conféssióne Christi, post multa torménta, cápite truncáti sunt.
5. Mútinæ in Æmilía, sancti Geminiáni, epíscopi, qui Ecclésiam suam ab ariánorum erróre ad orthodóxam fídem duxit.
6. In Pérside, pássio sancti Abrahæ, epíscopi Arbelénsis, qui sub Sápore rege Persárum, cum solem adoráre iussus renuísset, decollátus est.
7. Nováriæ in Ligúria, sancti Iúlii, presbýteri.
8. Romæ, commemorátio sanctæ Marcéllæ, víduæ, quæ, ut sanctus Hierónymus tradit, ópibus et nobilitáte contémptis, paupertáte et humilitáte nobílior facta est.
9. Fernæ in Hibérnia, sancti Mædhoc seu Aidáni, epíscopi, qui Ibídem coenóbium fundávit et máxima cláruit austeritáte.
10. In território Constantiénsi in Néustria, sancti Waldi, epíscopi Ebroicénsis.
11 . Monte Sancti Victóris prope Rangvílam in Bavária meridionáli, sancti Eusébii, qui, in Hibérnia natus, pro Christo peregrinátus est et, mónachus in coenóbio Sancti Galli efféctus, dénique eremíta evásit.
12. Romæ, beátæ Ludovícæ Albertoni, quæ, fíliis christiánis móribus pie institútis, post viri óbitum, Tértio Ordini Sancti Francísci adscrípta, paupéribus auxílium áttulit, ex dívite paupérrima facta.
13. Neápoli in Campánia, sancti Francísci Xavérii Maríæ Bianchi, presbýteri ex Ordine Clericórum Regulárium Sancti Pauli, qui, donis mýsticis práeditus, multos secum addúxit ad vitam sub Evangélii grátia agéndam.
14. In Coréa, Sanctórum mártyrum Augustíni Pak Chŏng-wŏn, catechístæ, et quinque sociórum,3 qui, plúribus tolerátis suppíciis, impávida fortitúdine christiánam fídem proféssi sunt et cápitis abscissióne Deum glorificavérunt. ____________________ 1 Quorum nomina: beáti Ioánnes Baptísta Triquerie, ex Ordine Fratrum Minórum Conventuálium; Ioánnes María Gallot, Ioséphus Pelle, Renatus Ludovicus Ambroise, Iuliánus Franciscus Morvin de la Gerárdiere, Franciscus Duchesne, Jacobus Andre, Andréas Duliou, Ludovicus Gastineau, Franciscus Migoret Lambardiere, Iuliánus Moule, Augustínus Emmanuel Philippot, Petrus Thomas. 2 Quorum nomina: beáti Daniel Karmasz, Lucas Bojko, Bartholomæus Osypiuk, Onuphrius Wasiluk, Philíppus Kiryluk, Constantínus Bojko, Míchæl Nicephorus Hryciuk, Ignatius Franczuk, Ioánnes Andrzejuk, Constantínus Lubaszuk, Maximus Hawryluk, Míchæl Wawrzyszuk.3 Quorum nomina: sancti Petrus Hong Pyŏng-ju, catechísta; María Yi In-dŏg, virgo; Magdaléna Son So-byŏg, Agatha Yi Kyŏng-i, Agatha Kwŏn Chin-i.
|
|
Deus Vult |
